ત્રીજા વાડીલાલ ઇન્ટરનેશનલ ગુજરાતી ફિલ્મ ફેસ્ટિવલ (IGFF)નું એટલાન્ટા, જ્યોર્જિયા,અમેરિકા ખાતે આયોજન કરવામાં આવ્યું હતું, આ સિનેમેટિક કલ્ચરલ ફેસ્ટિવલને ગુજરાત ટુરિઝમનો સહયોગ મળ્યો છે. કોરોના મહામારીને કારણે બે વર્ષના ગાળા બાદ IGFFની 20મી મેના રોજ ગ્રાન્ડ રેડ કાર્પેટ ઈવેન્ટ સાથે ઓપનિંગ સેરેમની સાથે થઈ હતી.
ઓપનિંગ સેરેમનીમાં એટલાન્ટાના જાણીતી હસ્તીઓ, મહાનુભાવો, ગુજરાતી સમુદાય અને ગુજરાતી ફિલ્મ જગતના સભ્યો હાજર હતા. માઈક મેસન (મેયર પીચટ્રી કોર્નર્સ), ડૉ. સ્વાતિ કુલકર્ણી (કોન્સ્યુલ જનરલ ઑફ ઈન્ડિયા), એટલાન્ટા, IGFF 2022ના અધ્યક્ષ ડૉ. નરેશ પરીખ તથા IGFFના સ્થાપક કૌશલ આચાર્ય ઉપસ્થિત રહ્યા હતા. પહેલા દિવસે રેડ કાર્પેટ પર ગુજરાતી ફિલ્મ ઈન્ડસ્ટ્રીના સેલેબ્સ હાજર રહ્યા હતા. જાણીતા ફિલ્મ નિર્માતા અને IGFF ફેસ્ટિવલના ડિરેક્ટર ઉમેશ શુક્લા, ફેસ્ટિવલ જ્યુરી મેમ્બર ગોપી દેસાઈ અને જય વસાવડા સહિત અન્ય સેલિબ્રિટીઓ જેમ કે ઈશાની દવે, પૂજા ઝવેરી, ચેતન ધાનાણી, દેવકી, ફિલ્મ નિર્માતા નિરજ જોષી ઉપસ્થિત રહ્યા હતા.
પહેલા દિવસે એટલાન્ટાના એક હજારથી વધુ ગુજરાતીઓ ગુજરાતી ફિલ્મ ફેસ્ટિવલમાં ઉમળકાભેર હાજર રહ્યા હતા. આંતરરાષ્ટ્રીય સ્તરે સૌથી વધુ પ્રશંસનીય ગુજરાતી ફિલ્મ ‘ધ લાસ્ટ ફિલ્મ શો’ ફેસ્ટિવલની ઓપનિંગ ફિલ્મ હતી અને ફિલ્મના લેખક-દિગ્દર્શક પાન નલિન પણ આ પ્રસંગે રેડ કાર્પેટ સેરેમનીમાં ઉપસ્થિત રહ્યા હતા.
IGFF અગાઉ વર્ષ 2018માં ન્યુ જર્સી ખાતે અને વર્ષ 2019માં લૉસ એન્જેલસ અને ન્યુ જર્સીમાં યોજાયો હતો. ફેસ્ટિવલમાં પાંચ હજારથી વધુ ગુજરાતી ફિલ્મના ચાહકોએ હાજરી આપી ફેસ્ટિવલને સફળ બનાવવામાં યોગદાન આપ્યું હતું.
21 અને 22 મે દરમિયાન ફેસ્ટિવલમાં સિલેક્ટ થયેલી ફિલ્મો દર્શાવવામાં આવી હતી. લોકલ કમ્યુનિટી અને પ્રેક્ષકો ફિલ્મોની સ્ક્રીનિંગને લઈને ખૂબ જ ઉત્સાહિત છે. તેમજ 22 મેના રોજ એટેલ કે ફેસ્ટિવલના અંતિમ દિવસે એવોર્ડ સમારોહ સાથે ગ્રૅન્ડ ક્લોઝિંગ નાઈટ યોજાઈ હતી. IGFF દરેક ઓફિશિયલ કોમ્પિટિશન કેટેગરી માટે એક વિશિષ્ટ ગ્રૅન્ડ પ્રાઈઝ વિજેતા પસંદ કરશે, જે સ્પર્ધાનું સર્વોચ્ચ અને સૌથી પ્રખ્યાત સન્માન છે. ફેસ્ટિવલની કલોઝિંગ ફિલ્મ તરીકે ગુજરાતી ફિલ્મ ‘21મું ટિફિન’ દર્શાવાઈ હતી.
