બૉયકોટ ટ્રેન્ડ પર કરણ જોહરે શું કહ્યું?

બૉલિવુડ આજકાલ ફિલ્મોના બૉયકોટ ટ્રેન્ડને કારણે પરેશાન છે. હિન્દી ફિલ્મ ઇન્ડસ્ટ્રીની ફિલ્મો એક પછી એક બૉક્સ ઑફિસ પર ઊંધે માથે પછડાઈ રહી છે. સુપરસ્ટાર્સમાં જેમની ગણતરી થાય છે એવા આમિર ખાન, રણબીર કપૂર કે અક્ષય કુમારના નામે પણ ફિલ્મો હિટ કરાવી શકતા નથી. એમાં ફિલ્મ ઇન્ડસ્ટ્રીને બૉયકોટ નામનું નવું ગ્રહણ લાગ્યુ છે. આ અંગે અનેક હસ્તીઓએ તેમની પ્રતિક્રિયા આપી છે એમાં હવે કરણ જોહરનો પણ ઉમેરો થયો છે.

હૈદરાબાદ ખાતે બ્રહ્માસ્ત્રના પ્રમોશન માટે ગયેલા કરણ જોહરે બૉલિવુડના બૉયકોટ ટ્રેન્ડ વિશે કહ્યું કે અમે સારી ફિલ્મ બનાવવાના પ્રયાસો કરીએ છીએ. જેમ એસ.એસ. રાજામૌલીએ કહ્યું કે આ ભારતીય સિનેમા છે. એને બીજું નામ આપવાની જરૂર નથી. પણ આપણે એને બૉલિવુડ, ટોલિવુડ જેવા નામો આપીએ છીએ. આપણે જંગલમાં નથી રહેતા, આપણે એની બહાર છીએ. અમને ગર્વ છે કે અમે ભારતીય સિનેમાના હિસ્સો છીએ. હવે દરેક ફિલ્મ ભારતીય હશે.

જોકે કરણ જોહરની આ ટિપ્પણી બ્રહ્માસ્ત્રને સોશિયલ મીડિયા પર બૉયકોટ કરવાનો ટ્રેન્ડ શરૂ થયા બાદ આવી છે. હકીકતમાં ધર્મા પ્રોડક્શનની ડેવલપમેન્ટ એક્ઝિક્યુટિવની એક ટ્વીટે ભારે ઉહાપોહ મચાવ્યો હતો. બબાલ મચ્યા બાદ ધર્મા પ્રોડક્શનની એક્ઝિક્યુટિવ શ્રીમી વર્માએ એનું ટ્વીટર અકાઉન્ટ બંધ કરી દીધું છે.

શ્રીમી વર્મા છેલ્લા થોડા વરસોથી એના ટ્વીટર હેન્ડલ પર અનેક અપમાનજનક અને હિન્દુ વિરોધી ટ્વીટ કર્યા છે. 2019માં એણે ગર્વથી ઘોષણા કરી હતી કે એના પિતા એક સંઘી હતા પણ એ નથી. સંઘી (આરએસએસનો સભ્ય) એક એવો શબ્દ છે જેનો ઉપયોગ ડાબેરીઓ હિન્દુઓની મજાક ઉડાવવા માટે કરતા હોય છે.

થોડા દિવસ પહેલા શ્રીમીએ લખ્યું, “Bhakts legit have such small d**k energy it’s just embarrassing”. સામાન્યપણે ભક્ત શબ્દ મોદી સમર્થકો માટે વાપરવામાં આવે છે. શ્રીમીનો દાવો છે કે આ વાક્યનો અર્થ – કૌશલ્ય વિના અહંકાર કે પુરુષત્વ બતાવવું થાય છે. પરંતુ અમુક નેટિઝન્સે એનો શાબ્દિક અર્થ લીધો અને કહ્યું કે શ્રીનીના કહેવાનો અર્થ થાય છે ભક્તોના જનનાંગ નાના હોય છે.

પત્યું, શ્રીમીના ટ્વીટ બાદ બ્રહ્માસ્ત્ર બૉયકોટ ટ્રેન્ડ થવા લાગ્યું.

બ્રહ્માસ્ત્રમાં રણબીર કપૂર, આલિયા ભટ્ટ, નાગાર્જુન, મૌની રૉય અને અમિતાભ બચ્ચન મુખ્ય ભૂમિકામાં છે. ફિલ્મ હિન્દી ઉપરાંત તમિલ, તેલુગુ, કન્નડ અને મલયાલમમાં પણ રિલીઝ થશે. 9 સપ્ટેમ્બરે રિલીઝ થઈ રહેલી બ્રહ્માસ્ત્ર 2-ડી, થ્રી-ડીમાં પણ માણી શકાશે. બ્રહ્માસ્ત્ર બૉયકૉટ ટ્રેન્ડ છતાં મળતા અહેવાલ મુજબ અત્યાર સુધીમાં ફિલ્મની દસ હજારથી વધુ ટિકિટો વેચાઈ ચુકી છે.