તારક મહેતા કા ઉલ્ટા ચશ્મામાં પોપટલાલ દ્વારા થઈ રહેલા સ્ટિંગ ઑપરેશનના પ્લાન પર પાણી ફરી વળ્યું. એ તો જગજાહેર છે કે કોવિડના ઉપચાર માટેની દવાઓ અને અન્ય વસ્તુઓની થઈ રહેલી કાળાબજારી કરનારાઓનો ભંડાફોડ કરવા માટે પત્રકાર પોપટલાલે સ્ટિંગ ઓપરેશન શરૂ કર્યું અને એ માટે ડૉ. હાથીની સહાય લીધી. તેઓ સ્ટિંગ ઓપરેશન માટે વેશ બદલો કરતા અને જ્યાં કાળાબજારી થતી ત્યાં પહોંચી જતા. જોકે અજાણતા જ કાળાબજારિયાઓને ડૉ. હાથીની અસલિયત વિશે જાણ થાય છે અને તેઓ હાથીનું અપહરણ કરી જાય છે.
જેઠાલાલ અને પોપટલાલ નવેસરથી સ્ટિંગ ઓપરેશન શરૂ કરે છે અને કેવી રીતે દવાઓના કાળા બજાર કરનારાઓને પકડાવે છે અને અપહરણ કરાયેલા ડૉ. હાથીને કેવી રીતે છોડાવે છે એ જોવું ઘણું રસપ્રદ બનશે.
સિરિયલમાં કાળાબજાર કરનાર વિલનની ભૂમિકા ગુજરાતી-હિન્દી ફિલ્મ-ટીવી-વેબ સિરીઝ-નાટકના જાણીતા કલાકાર મુનિ ઝા ભજવી રહ્યા છે. આવા ધુરંધર કલાકાર સાથે જેઠાલાલ (દિલીપ જોશી), પત્રકાર પોપટલાલ (શ્યામ પાઠક) અને ડૉ. હાથી (નિર્મલ સોની)ની અભિનયની જુગલબંદી જોવાનો લ્હાવો દર્શકોને મળશે.