હિતેન કુમાર… ગુજરાતી ફિલ્મ ઇન્ડસ્ટ્રીના હરફનમૌલા એવા આ કલાકારે પહેલી ઇનિંગમાં જેટલી વૈવિધ્યસભર ભૂમિકા ભજવી હતી એના કરતા વધુ બીજી ઇનિંગમાં ભજવી રહ્યા છે. રાડો, વશ, વેલકમ પૂર્ણિમા જેવી અનેક ફિલ્મો એનું ઉદાહરણ છે. હવે અભિનેતાની ફિલ્મ તારો થયો જાન્યુઆરીમાં રિલીઝ થઈ રહી છે જેમાં હિતેન કુમાર (કેદાર) અને કાજલ ઓઝા વૈદ્ય (મિતાલી)નો એક અનોખો પ્રેમોત્સવ જોવા મળશે. 17 જાન્યુઆરીના રિલીઝ થઈ રહેલી લીલામોહન પ્રોડક્શન હાઉસની ફિલ્મ તારો થયોની લવની વ્યાખ્યા છે સાચો પ્રેમ એટલે એક જ વ્યક્તિના પ્રેમમાં વારંવાર પડવું. ફિલ્મમાં હિતેન કુમાર અને કાજલ ઓઝા વૈદ્ય ઉપરાંત સની પંચોલી (આરવ) અને વ્યોમા નંદી (અંતરા) પણ મહત્વની ભૂમિકામાં છે.
અવૉર્ડ વિજેતા એડિટર અને દિગ્દર્શક ધર્મેશ પટેલની ફિલ્મના નિર્માતા છે વિજય ચૌહાણ, નિધિ ચૌહાણ અને સંજય ચૌહાણની તારો થયોમાં હિતેન કુમાર, કાજલ ઓઝા વૈદ્ય, સની પંચોલી, વ્યોમા નંદી ઉપરાંત નમન ગોર, રીવા રાચ્છ, વિસ્તાસ્પ ગોટલા, સોનુ ચંદ્રપાલ, જાહ્નવી પટેલ, ફિરોઝ ઇરાની, હિતેશ રાવલ, જિગ્નેશ મોદી અને ખાસ ભૂમિકામાં હિતુ કનોડિયા જોવા મળશે. તારો થયોની વાર્તા જાણીતાં લેખિકા અને વક્તા કાજલ ઓઝા વૈદ્યની છે.
પેનોરમા સ્ટુડિયોઝ દ્વારા રિલીઝ થનારી ફિલ્મનું સંગીત રિપુલ શર્મા અને અભિજીત વઘાનીએ આપ્યું છે. ફિલ્મમાં વિવિધ ભાવના છ ગીતો છે જેમાં ઓસમાણ મીરનાં ગીતો પણ છે. ફિલ્મ 17 જાન્યુઆરી, 2025ના રિલીઝ થઈ રહી છે.
ફિલ્મનું ટીઝર જોવા નીચેની લિન્ક પર ક્લિક કરો
