આપનું માનીતું ફિલ્મી ઍક્શન આપ સૌના માટે ખાસ લાવી રહ્યું છે, એક જોરદાર… દમદાર… શ્રેણી શરૂઆતથી રજૂઆત સુધી. આ શ્રેણીમાં કોઈ પણ ફિલ્મ, નાટક કે સિરિયલની શરૂઆતથી લઈ રજૂઆત સુધીની રજેરજની રસપ્રદ વિગતો અને માહિતી….
અમારી આ શ્રેણીની શરૂઆત અમે કરવા જઈ રહ્યા છીએ ગુજરાતના લોખંડી પુરુષ સરદાર પટેલને કેન્દ્રમાં રાખી બની રહેલી ‘હા હું પટેલ છું’ ફિલ્મથી.
ફિલ્મ વિષેની લેટેસ્ટ અને રસપ્રદ જાણકારી મેળવવાનો સૌથી ઉત્તમ સ્રોત હોય તો એ છે ફિલ્મના દિગ્દર્શક. એટલે સૌપ્રથમ અમે એનો સંપર્ક કર્યો જેઓ ઢોલિવુડમાં જ નહીં, બૉલિવુડમાં પણ ખ્યાતિ ધરાવે છે એવા જાણીતા લેખક-દિગ્દર્શક મનોજ નથવાણીનો.
મનોજ નથવાણીએ સૌપ્રથમ ફિલ્મી ઍક્શનને પાંચમી વર્ષગાંઠની શુભેચ્છાઓ આપવાની સાથે જણાવ્યું કે, ફિલ્મનું ટાઇટલ પટેલ છે તો સ્વાભાવિક છે કે ફિલ્મ પણ પટેલ સમાજના આદર્શ, સંસ્કાર, સંસ્કૃતિ, રીતભાત પર આધારિત હોવાની, આમ છતાં તમામ પ્રેક્ષકોના મનોરંજનને કેન્દ્રમાં રાખી અમે ફિલ્મ બનાવી રહ્યા છીએ. અને હા, પટેલ સમાજને તો વારંવાર જોવી ગમશે જ એવી સુંદર વાર્તા અને સંવાદો સાથે અમે આવી રહ્યા છીએ.
ફિલ્મની સહુથી ખાસ વાત એટલે પટેલ એસ્ટેટમાં વસતા પરિવારો.
આ પરિવારના સભ્યોની સહુથી મોટી વિશેષતા એ છે કે આ કલાકારો દર્શકોમાં ખૂબ જ લોકપ્રિય છે. અભિનય ક્ષમતાના જોરે દર્શકોની અપાર ચાહના મેળવનારા કલાકારો છે જાજરમાન અભિનેત્રી પ્રતિમા ટી., હેમંત જહાં, હિતેશ ઉપાધ્યાય, હરિકૃષ્ણ દવે, જિતેન્દ્ર કોટક, અસ્મિતા પંચાલ, પિયુષ અઢિયા અને મનીન ત્રિવેદીની સાથે છે ધારા જાની (આણંદ – અમેરિકા), પ્રિયંકા પટેલ (સુરત – મુંબઈ), પૂર્ણિમા દેસાઈ (વડોદરા – અમેરિકા), આરતી ઠકકર (વડોદરા- અમેરિકા) અને ફિરોઝ ઇરાની. ફિલમનું સંગીત ગુજરાતી ફિલ્મના વિખ્યાત સંગીતકાર પંકજ ભટ્ટ આપી રહ્યા છે તો ડીઓપી છે સુશાંત પટેલ.
ભાઈ, વાર્તા પટેલ ઉપર હોય એટલે કાઠિયાવાડ, કચ્છ, ઉત્તર ગુજરાત, ચરોતર, મુંબઈથી લઈ વિદેશમાં વસતા સમાજની લાગણીઓને ન્યાય આપી શકાય એ રીતે અમે ફિલ્મના કલાકારોની પસંદગી કર્યા બાદ હવે ફિલ્મને ફ્લોર પર લઈ જવાની તૈયારી થઈ રહી છે. શૂટિંગ પૂર્વેની તમામ તૈયારી સરળતાથી પાર પાડવા માટેનું પૂરૂં શ્રેય ફિલ્મના નિર્માતા વિજયભાઈ કીકાણી, પ્રસ્તુતકર્તા શરદભાઈ દેસાઈ, નિર્માણ રચનાકાર હિરેનભાઈ હરસોડા અને લાલુભાઇ ભરવાડને જાય છે.
