મજેદાર ડાયલોગ ડિલિવરી અને અર્થસભર કૉમેડીથી વર્ષોથી પ્રેક્ષકોના દિલમાં વસતી અભિનેત્રી કેતકી દવે
ગુજરાતી રંગભૂમિ, ટીવી અને સિનેમામાં પોતાના અલગ અંદાજ, મજેદાર ડાયલોગ ડિલિવરી અને અર્થસભર કૉમેડીથી વર્ષોથી પ્રેક્ષકોના દિલમાં વસતી અભિનેત્રી કેતકી દવે આજે પણ એટલી જ ઉત્સાહી અને પ્રેરણાદાયક છે. ‘સાસુ-વહુ’થી લઈને ‘પત્ની-પતિ’ સુધીના સંબંધોને હાસ્યમાં પીરસી, સમાજને અરીસો બતાવતી કેતકી દવે સાથે થયેલી વાતચીતમાં તેમના નવા નાટકથી લઈને થિયેટરના બદલાતા સ્વરૂપ સુધીની અનેક રસપ્રદ વાતો જાણવા મળી.
‘પત્ની પ્રીમિયર લીગ’ એક એવું નાટક જેમાં આજની ઝેન-જી માટે હાસ્યમાં છુપાયેલો એવો સંદેશ છે જે તેમના જીવનનો દૃષ્ટિકોણ બદલી શકે છે.
અત્યારે તમે જે નાટકનું રિહર્સલ કરી રહ્યા છો, એ વિશે જણાવશો?
અત્યારે હું ‘પત્ની પ્રીમિયર લીગ’ નામના નાટકનું રિહર્સલ કરી રહી છું. નામ પરથી જ ખબર પડી જાય કે વાત પતિ-પત્ની વચ્ચેની છે. હંમેશા જેમ હું મહિલાઓના પક્ષની વાત રજૂ કરું છું, એ જ રીતે અહીં પણ કૉમેડી દ્વારા મહિલાઓને પ્રોત્સાહન અને પ્રેરણા આપવાનો અમે પ્રયાસ કર્યો છે. હસ્યા વગર જિંદગી ચાલે નહીં, એટલે હાસ્ય સાથે સંદેશ આપવો એ મારી સ્ટાઈલ છે.
રસિકભાઈ અને સરિતાબેન સાથેના નાટકોમાંથી કયું તમને સૌથી પ્રિય છે?
‘હું રીમા બક્ષી’ મારું પ્રથમ નાટક હતું જેનું દિગ્દર્શન મારાં મમ્મીએ કર્યું હતું. આ નાટક કરતી વખતે રંગમંચના અનેક પાઠ શીખવા મળ્યા. રસિક દવે સાથે રાણી ને ગમે તે રાજા ને તકદીરનો અક્કા જો’ જેવા અનેક હિટ નાટકો કર્યા. શૈલેષ દવે સાથે ‘ઓળખાણ’, પરેશ રાવલ સાથે ‘મૂળરાજ મેન્શન’—આ બધા અનુભવ આજે પણ યાદગાર છે.
ત્યારે અને અત્યારે: રંગભૂમિમાં ફેરફાર
અગાઉની અને આજની નાટક ઇન્ડસ્ટ્રીમાં તમને શું ફરક લાગે છે?
ફેરફાર તો સમય સાથે થવાનો જ. પહેલાં ટીવી-ઓટીટી નહોતાં, એટલે થિયેટરમાં જ શ્રેષ્ઠ ટેલેન્ટ મળતું. આજે વિકલ્પો વધી ગયા છે. છતાં, જે પ્રેક્ષક થિયેટર સુધી આવે છે, એ સાચો જોડાયેલો પ્રેક્ષક છે. લાઈવ થિયેટરનો અનુભવ આજે પણ અનોખો છે.
ટીવી, ફિલ્મ અને પસંદગીની સિલેક્ટિવિટી
સિરિયલ્સ અને ફિલ્મો વિશે તમારો અભિગમ શું છે?
સિરિયલ બહુ સમય માંગે છે, એટલે હું બહુ સિલેક્ટિવ છું. નાટકમાં રોજ નવું જીવંત અનુભવ મળે છે. ફિલ્મોમાં ‘પપ્પા તમને નહીં સમજાય’ પછી ઘણી ઓફર્સ આવી, પણ મને ગમે એવું હજી નથી મળ્યું. રાહ જોવી પડે તો પણ ચાલે, પણ સારું કામ કરવું છે.
આજે ગુજરાતી ફિલ્મ ઇન્ડસ્ટ્રી 200 કરોડની થઈ ગઈ છે, તમે શું કહેશો?
આ ખૂબ ખુશીની વાત છે. સરકારની સબસિડી, સારા પ્રોડ્યુસર્સ અને ટેલેન્ટ—બધંસ મળી રહ્યું છે. હવે ગુજરાતીઓ પાછળ નહીં રહે, આગળ આવશે. ચર્ચા થવી જોઈએ અને થઈ પણ રહી છે.
અંતમાં…
હાસ્ય, અનુભવ અને વિચારોથી ભરપૂર કેતકી દવે આજે પણ એટલી જ સક્રિય છે. રંગભૂમિ પ્રત્યેનો તેમનો પ્રેમ અને મહિલાઓ માટેનો સંદેશ તેમને માત્ર અભિનેત્રી નહીં, પરંતુ એક પ્રેરણાસ્ત્રોત બનાવે છે.
