બૉલિવૂડના વિલન પ્રાણની ખલનાયકીનો પ્રભાવ એટલો જબરજસ્ત હતો કે લોકો તેમને હકીકતમાં ખરાબ જણ માનતા. વિલન તરીકે તેમની ખ્યાતિ જબરજસ્ત હતી પરંતુ કોઈ તેમના દીકરાનું નામ પ્રાણ રાખવા રાજી નહોતું. જોકે ફિરોઝ ઈરાની આ મામલે ઘણા નસીબદાર રહ્યા. તેમને એક કલાકાર તરીકે દેશ-વિદેશના તમામ ગુજરાતી દર્શકોનો પ્રેમ અવિરત મળતો રહ્યો. જોકે ફિરોઝ ઇરાની તેમની આટલી પ્રદીર્ઘ કારકિર્દીનું રહસ્ય જણાવતા કહે છે, હું આટલી લાંબી ઇનિંગ રમી શક્યો એનું કારણ છે પ્રાણ સાબ.
ફિરોઝભાઈની વાત કરીએ તો ચાર દાયકાથી વધુની કરિયર, 550થી વધુ ગુજરાતી, 100થી વધુ હિન્દી ફિલ્મો ઉપરાંત પચાસેક જેટલી હિન્દી-ગુજરાતી સિરિયલોમાં ફિરોઝ ઇરાનીને દર્શકોએ જોયા માણ્યા હોવા છતાં તેમને ફિલ્મમાં જોવા દર્શકોને આતુર રહે છે. આજે પણ તેઓ જિતેન્દ્ર ઠક્કર, સ્મિતા જયકર, રાગી જાની સાથે અડકો દડકો, મનોજ નથવાણીની હા, હું પટેલ છું, જેનું પચાસ ટકા શૂટિંગ પૂરૂં થયું છે એવી ગુજરાતનું ગૌરવનું શૂટિંગ અમેરિકા અને કચ્છમાં થઈ રહ્યું છે. આ ફિલ્મ નિર્માતા-દિગ્દર્શક ખાસ આગ્રહને કારણે ફિરોઝ ઇરાનીને કાસ્ટ કરવામાં આવ્યા છે. ઉપરાંત સુપરહિટ ફિલ્મ ચીમનભાઈની ચાલની સિક્વલ પણ હાલ સાઇન કરી છે.
ઉલ્લેખનીય છે કે ફિરોઝ ઈરાનીના પિતા ફરેદુન ઈરાની નાટક કંપની ચલાવતા હતા. એફ આર ઈરાની તરીકે જાણીતા ફરેદુન ઈરાનીની લક્ષ્મી કલાકેન્દ્ર નામે ડ્રામા કંપની હતી. જેનાથી જ ફિરોઝ ઈરાનીએ એક્ટિંગની શરૂઆત કરી હતી. 8 વર્ષની ઉંમરે તેમણે છોરુ કછોરું નામના નાટકમાં કામ કર્યું હતું. અને 1967માં 17 વર્ષની ઉંમરે ‘ગુજરાતણ’ નામની ફિલ્મથી વિલન તરીકે ગુજરાતી ફિલ્મોમાં ડેબ્યુ કર્યો હતો. જેમાં વિજય દત્ત હીરો હતા અને અરૂણા ઈરાની હિરોઈન હતા. બસ પછી તો ફિરોઝભાઈ પોતાની કરિયરમાં સંખ્યાબંધ હિટ ફિલ્મો આપી ચૂક્યા છે.
ફિરોઝ ઇરાનીએ તેમની આટલી લાંબી કરિયર દરમિયાન બૉલિવુડના દિગ્ગજ કલાકારો દેવ આનંદ, ધર્મેન્દ્ર, અમિતાભ બચ્ચન, જયા પ્રદા, પરેશ રાવલ, અન્નુ કપૂર, અક્ષય કુમાર, વિવેક ઓબેરોય સહિત અનેક અભિનેતા-અભિનેત્રીઓ સાથે કામ કરી ચુક્યા છે. તો 1967 બાદ ગુજરાતી ફિલ્મ ઇન્ડસ્ટીમાં આવેલા લગભગ તમામ કલાકારો સાથે કામ કર્યું હોય એવા અભિનેતા હોય તો એ છે માત્ર ફિરોઝ ઇરાની.