ગુજરાતી ફિલ્મ ઇન્ડસ્ટ્રીને સદ્ધર બનાવવામાં મહત્ત્વનું યોગદાન આપનાર સર્જક મનોજ નથવાણીની તાજેતરમાં રિલીઝ થયેલી ફિલ્મ હા, હું પટેલ છું ગુજરાતમાં ધૂમ મચાવી રહી છે. અનેક ગુજરાતી હિટ ફિલ્મોના લેખક-દિગ્દર્શક મનોજ નથવાણી હવે બાબા શ્યામ હમારેથી રાજસ્થાની ફિલ્મ ઇન્ડસ્ટ્રીમાં એન્ટ્રી કરી રહ્યા છે. તાજેતરમાં ફિલ્મનો ફર્સ્ટ લૂક રિલીઝ કરવાની સાથે એની રજૂઆતની તારીખ પણ જાહેર કરવામાં આવી છે.
બાબા શ્યામ હમારે અંગે જણાવતા મનોજ નથવાણી કહે છે કે, અમારા નિર્માતા અને શ્રી શ્યામ ભક્ત સુરેશ કુમાર અડુકિયાજી બાબા શ્યામ પર એક ફિલ્મ બનાવવાનું વિચારી રહ્યા હતા. અમારી મુલાકાત થઈ અને ફિલ્મનો પ્રોજેક્ટ તૈયાર કર્યો. ખાટુ શ્યામ બાબાની કૃપાથી ફિલ્મ પૂર્વેની તમામ તૈયારી નિર્વિઘ્ને પાર પડી અને 26 જાન્યુઆરીએ અમે સુરત સ્થિત શ્રી શ્યામ મંદિર ખાતે ફિલ્મનું મુહૂર્ત કરી રહ્યા છીએ.
ગુજરાતીઓ માટે કદાચ બાબા શ્યામનું નામ અજાણ્યું હશે. પરંતુ હિન્દુ ધર્મ અનુસાર, બર્બરિકના મહાન બલિદાનથી પ્રસન્ન થયેલા શ્રી કૃષ્ણએ વરદાન આપ્યું કે કળયુગમાં એ શ્યામના નામથી પૂજાશે. એ સાથે જણાવ્યું કે પૂરા ભક્તિભાવથી તમારા નામનું સ્મરણ કરનારનો ઉદ્ધાર થશે. જો તેઓ તમારી સાચા દિલથી પૂજા કરશે તો તેમની તમામ મનોકામનાઓ પૂરી થશે અને તમામ કાર્યોમાં સફળતા પ્રાપ્ત કરશે. બસ, આ વાત કેન્દ્રમાં રાખી ફિલ્મની વાર્તા તૈયાર કરી છે જેમાં રાજસ્થાની ફિલ્મના સ્ટાર રમેશ ગુણાવત મુખ્ય ભૂમિકા ભજવી રહ્યા છે.
મનોજ નથવાણીએ વધુમાં જણાવ્યું કે, ફિલ્મનું શૂટિંગ સુરત ઉપરાંત રાજસ્થાનના વિવિધ લોકેશન પર કરવામાં આવશે. અમે પોસ્ટર લૉન્ચ કરવાની સાથે ફિલ્મની રિલીઝની તારીખ પણ જાહેર કરી છે. બાબા શ્યામ હમારે 11 માર્ચ, 2022ના રાજસ્થાન ઉપરાંત ગુજરાતમાં પણ રિલીઝ કરાશે. ફિલ્મના સહ નિર્માતા છે મનોજ બંસલ, વિજય કિકાણી અને શરદ દેસાઈ.
અત્રે ઉલ્લેખનીય છે કે કિલ્લા પારડી (જિલ્લા વલસાડ)ના અગ્રણી એવા શરદ દેસાઈએ અનેક ગુજરાતી ફિલ્મોમાં મનોજ નથવાણીને સાથ-સહકાર આપ્યો છે. હવે જ્યારે મનોજ નથવાણી રાજસ્થાની ફિલ્મ બનાવી રહ્યા છે ત્યારે પણ શરદભાઈ તેમને સાથ આપવા આગળ આવ્યા છે. મનોજ નથવાણીની બાબા શ્યામ હમારેને પણ શરદ દેસાઈ પ્રસ્તુત કરી રહ્યા છે.
મનોજ નથવાણી રાજસ્થાની ફિલ્મમાં પણ ગુજરાતના પ્રતિભાશાળી કલાકારોને મોકો આપી રહ્યા છે. ગુજરાતની જાણીતી અભિનેત્રી પ્રિયંકા પટેલ ઉપરાંત મનિન ત્રિવેદી અને ચેતન ઠાકરને પણ બાબા શ્યામ હમારેમાં મહત્ત્વની ભૂમિકા સોંપી છે.
ફિલ્મના સંગીતકાર છે પંકજ ભટ્ટ , કૉરિયોગ્રાફર મહેશ બલરાજ, ડીઓપી યુવરાજ ન્યૂપાણે અને ફાઇટ ઇરફાન પીરઝાદાની છે.
